AJIN AKALAN SIDIN WARA! (JANGAN-JANGAN AKALAN BELIAU SAJA!)

AJIN AKALAN SIDIN WARA

Buah Karya: Silfina Rahayu

• Tema: Mehilung Budaya, Maungkai Kisah Kamuhara
• Judul: Ajin Akalan Sidin Wara  (Jangan-jangan Akal Beliau saja!)
• Isu: Kurangnya kepedulian dan guyub serta daya tanggap pada masyarakat khususnya terhadap keamanan dan silaturahmi dalam suatu lingkungan dan kehidupan bermasyarakat.
• Budaya: Budaya Guyub/kebersamaan dalam masyarakat khususnya urang Banjar (di gambarkan pada kegiatan Siskamling dan Pos Ronda di Gardu)
• Jenis Lakon: Modern-Komedi
• Latar Tempat: Gardu Perkampungan (Kampung Murung Rahayu)

• Dramatis Personae: 

- Pambakal Isim

Status:Pambakal Kampung, 45 Tahun

Karakter: Paduli wan kampung sidin, Tegas

- Bah Ahuy

Status: Jagaunya Kampung, 60 Tahun

Karakter: Katuju Baingun Burung, Harat

- Amah

Status: Selebgram Kampung, 23 Tahun

Karakter: Muntung Toa/Tumbur, Kisah Pawanian

- Anti/Anto

Status: Tukang Salon Kampung, 25 Tahun

Karakter: Babanciran

- Jali 

Status: Anaknya Ma Ilay, 20 Tahun

Karakter: Masih Kaya Kakanakan, Pangencet

- Ma Ilay

Status: Mamanya Jali, 40 Tahun

Karakter: Pemamaian

- Reporter 

     Status: Pembawa Berita/Reporter

Karakteristik: Binian

• Sinopsis:

Pambakal Isim gundah gulana gara-gara mandangar barita bahilangan tarus. Teingat pambakal nawan gardu nang tabangkalai gara-gara banyak urang kampung yang kada inisiatif marawat basamaan wan kada manjaga budaya kaya bahari di kampung baliau. Baisi akalan hidin gasan mehidup akan wan maangkat baasa kagiatan di gardu gasan malastariakan  sajarah nang pernah ada. 

• Alur:

Lakon 1 Babak

• Adegan 1

Reporter membawa berita banyak kajadian bamalingan yang selalu meresahkan warga di suatu kampung bernama “Maju Mundur”. Barita ini meolah Pambakal di kampung higanya, yaitu kampung “Murung Rahayu” gair lawan kampung hidin kalonya mangalami kajadian yang sama.

• Adegan 2: (Malam Hari)

Habis Pambakal mandangar barita tantang banyak kajadian bamalingan tarus. Pina gair Pambakal wan kampung hidin kalu-kalu taumpat bahilangan jua, di tambah keadaan urang kampung nang kada tapi paduli wan kaadaan Gardu di Kampung yang bahari rancak di jadiakan tampat bekumpulan wan pos Ronda.

Pambakal bapandiran wan Bah Ahuy (Jagaunya wan tatuhaan Kampung) di Gardu, maminta saran gasan manjaga kampung supaya tatap aman, nawan membulik akan kaadaan gardu supaya barami kaya bahari lagi. Bah Ahuy malihat kaadaan marasa kada yakin lawan kainginan Pambakal malihat inisiatif wan kapadulian anggota/urang kampung maramii gardu wan manjaga kaamanan barsama, di tambah malihat buhan nang anum jua kada paduli, serta menganggap bahwa kampung akan tetap aman di tangan beliau.

Hingga tapikir pambakal cara gasan meolah akal gasan maadakan pos ronda yang sampat lawas kada tajalani. Tapi bukannya nang tuha yang menjalani akan, tapi buhan yang anumnya yang di jadwal akan. Maksud sidin nii lain gasan meadakan pos ronda wara tapi jua gasan bakumpulan wan nang anum supaya tahu budaya yang bahari ada.

• Adegan 3: (Malam Hari)

Buhan nang anum yang di jadwal akan kagarduan sasuai suruhan pambakal sabalumnya, di kawani pambakal sambil bapandiran masalah bahilangan yang rancak kajadian di barita. Bajagaan, bapandiran, sambil bekisahan gardu bahari yang wahini timbulan kada tapi diurusi gasan bajaga kaamanan kampung. Namun buhannya manti di tinggalakan wan pambakal nang kasakitan parut kada tahan lagi.

Buhannya batiga bapanderan, behualan sampai ada kajadian yang kada di harapkan. Ada nang menakutani buhannya. Tadapat urang nang kaya maling handak menggawi buhannya batiga. 

Sakalinya ini akalan pambakal gasan maajari buhannya kalonya bahaya bisa haja ada di dapan mata, dan baramian salah satu solusi gasan malastariakan kaamanan barsama-sama.

Pas sudah ampih batumburan wan meakali buhannya, bujuran tajadi bahilangan. Amasnya Ma Ilay Bahilangan. Dikira akalan pambakal wara, sakalinya salah tarka.

• Adegan 4

Reporter membawakan berita tentang tertangkapnya maling yang meresahkan warga di kampung Murung Rahayu.

BABAK 1 

Adegan 1 (Set Trap)

(Lighting on)

Barita banyaknya kajadian pencurian di kalangan masyarakat yang meresah akan. Barita yang meolah resah wan sudah manjadi katakutan pambakal kalo-kalonya bisa tarjadi pabila haja di kampung hidin, yaitu kampung Murung Rahayu. 

¹Reporter         : Baik, saudara Tono saya melaporkan dari lokasi kejadian, tepatnya di Kampung Maju Mundur telah terjadi pencurian jemuran warga yang tidak diketahui, saya pun tidak mengetahui dalang pencurian ini dan siapa saja korbannya, sayangnya pencuri berhasil kabur dari ringkusan polisi dan warga setelah berhasil menyelesaikan aksinya. Alhasil warga dan kepolisian setempat sedang mengejar si pencuri. Seperti yang terlihat di belakang saya nampak tidak ada siapapun dan saya seorang diri di kampung ini. Sepertinya jaringan semakin memburuk, baiklah sekian yang dapat saya laporkan dari TKP, jangan lupa tetap berwaspada.

(Black Out)

Adegan 2 (Set Rumah Pambakal-Malam Hari)

(Lighting on)

Pambakal habis mendangarakan barita bamalingan di kampung subalah yang meolah sidin resah. 

²Pambakal       : Ummmaaa! (Pusang)

³Pambakal       : Kayapa ini kisahnya sawat bamalingan tarus di barita, amun kaya ini kisahnya kaadaan kampungku nii ngarannya siaga satu, (Jeda, tapikir) kyapa ini kalonya kampung nii jua sawat bahilangan kaya kampung subalah, Haduhhh… (Pusang)

(Bah Ahuy masuk panggung sambil mambawa ingunan sidin, malihat Pambakal pina pusang)

⁴Bah Ahuy       : (Basyair) Burung nuri terbanglang tinggi…Terbanglah tinggi hinggap di dahan… Sholawat gasan Baginda Nabi… Dapat syafaat sabarataan…

Uuu urangnya, nangapa Sim pina pusang banar? (Heran malihat pambakal isim)

⁵Pambakal       : Nahh nah Bah Ahuy, kabujuran pian lewat, kita harus bapandiran Bah aii

⁶Pambakal       : Jadi ulun nii lagi pusang nah Bah aii, Pusaaang babanaran

⁷Bah Ahuy       : Pusang nangapa Sim? Pusang kada kawin-kawin kah? (Mehapaki begayaan)

⁸Pambakal       : Ummaaa, diingati pulang wan baliau ngini, nyata kada bah aii, kada. Ini lebih mamusangi dari soalan nangitu!

⁹Bah Ahuy       : Nangapa? Pinaaa pusang babanaran ikam nii, cuba bakisah dahulu

¹⁰Pambakal      : Nah jadi kyani bah…

¹¹Bah Ahuy     : Hah? (mangajuti)

¹²Pambakal      : Balum Bah, balummm, pian nii aii, ulun nii lagi pusang nah Bah aii, ulun habis mandangar barita di tv tantang kampung subalah nang rancak kamalingan, handak saban kalian kada baya sekali wara haja

¹³Bah Ahuy     : Tarus pang?

¹⁴Pambakal      : Ahhh pian nih (kecewa) ulun nii gair kalonya kampung kita nii jadi incaran salanjutnya wan maling ngitu. Banyak warga kita nii nang sugih-sugih. Tu nang ampun Almarhum Haji Hasim dua tingkat rumah hidin, ampun acil Ijum nang parak masigit tu luas babanaran tanahnya, banyak aii lagi yang lain jua, kyapa ulun nii kada gair…

¹⁵Bah Ahuy     : OOOOO

¹⁶Pambakal      : O aja kah Bah? 

¹⁷Bah Ahuy     : Aku ada aii jua mandangar sabujurannya barita nang di tv yang lagi viral tu, Nah ujarnya jua malingnya tu kada tadapat sampai wahini 

¹⁸Pambakal      : Nah Nangitu Bah aii! (mangajuti Bah Ahuy)

¹⁹Bah Ahuy     : (Takajut) Ikam nii mangajuti nang tuha (sangit) Nah lo ingunan ku takajut jua jadinya, kalo aku wan inya mati disini kyapa?

²⁰Pambakal      : Ulun kubur akan aii lagi, eh kada-kada, pian pang tadi mangajuti ulun jua…

²¹Bah Ahuy     : Heeeeh ikam nii (grigitan) mbah pang ikam handaknya kyapa? (masih muar)

²²Pambakal      : Sabujurnya ulun nii jadi taingat Bah aii bahari tu pas masih anum rancak babanaran umpat buhan pian ka Gardu, bajagaan, sambil bakumpulan, rancak baramian, habistu bapandiran, kada tatinggal barukuan, lanjut bamakanan, sampai ulun teguring-guring.

²³Bah Ahuy     : Jadi maksud ikam, handak maada akan jadwal ronda gasan bajagaan kaya bahari pulang kah?

²⁴Pambakal      : Nah 1000% bujur banar pian

²⁵Bah Ahuy     : Haduh Isim Isim, ikam nii kada sadar jua kah lagi wan kaadaan wahini? Cukup aku ja yang manjaga kampung nii, aku nih jagaunya kampung…

            (Bapantun) Iwak sapat ungkai sapiring… Iwak timpakul campur hintalo… Amun sawat aku manciling… Pasti tapacul bigi lato-lato…

²⁶Pambakal      : Wayoooo!!! Pian kan sudah tuha

²⁷Bah Ahuy     : Mbah pang mun aku tuha kenapa? Ikam meragu akan aku kah? Yang tuha nii luarnya haja

²⁸Pambakal      : Wayoooo!!! Kadanya kyatu bah aii, ulun nii ada niatan lain, handak maajar akan pamuda kampung kita jua…

²⁹Bah Ahuy     : Jadi maksud kam nang anumnya nang bajagaan?

³⁰Pambakal      : Nah 2000% bujur pulang pian bah aii, sekali lagi dapat kulkas nah, jadi nang anumnya yang kita jadwal akan Bah aii, kyapa?

³¹Bah Ahuy     : Handak yang tuhaanya nang di jadwal akan, nang tuhanya matian barataan dah, aku ja lagi tasisa…

³²Pambakal      : Nah itu pang jua Bah aii, mahadang pian haja lagi nii (tatawa) 

³³Bah Ahuy     : Kada tapi pintar wan nang tuha, mandoa akan lakas mati

³⁴Pambakal      : Ulun bagayaan haja, Ampuuunnn Bah… Maksud ulun tinggal pian ja lagi setuju atau kada

³⁵Bah Ahuy     : Muar aku wan ikam nih, kada Sim kada ujarku, apalagi mun buhan nang anumnya nang bajagaan, kada parcaya aku, cukup aku ja, aku nii kawa haja surangan manjaga kampung nii…

³⁶Pambakal      : Kita cubai aii dulu bah aii…

³⁷Bah Ahuy     : Hmmm yakin lah ikam? Jangan sama akan wan generasi wahini, cuba kam itihi urang kampung kita wahini, sampai gardu balumutan gin pinanya kdda nang handak balirik kasana, sunyiii barangnya. Mana kada tapi taurusi, sampah bahambur kada dibarasihi, barang-barang disana kada dirawati, amun mamakai kada diapiki. Aku asa kada yakin Sim aii wan niatan ikam nii, ada ka gardu duduk gin sukur sudah, handak ikam ulah pos ronda lah nang bajagaan malam

³⁸Pambakal      : Oleh itu pang Bah aii kita cubai jar ulun tadi, kita baulah rami kaya bahari lagi salajur manjaga kaamanan kampung kita. Tambah lagi amunnya kampung kita nii rami, buhan nang anumnya pasti nyaman di dalam kampung surang. Jadi tajagai kalakuan kanakan kita jua…

³⁹Bah Ahuy     : Mbah pang kyapa rancana ikam?

⁴⁰Pambakal      : Jadi kyani Bah…

(Black Out)

Adegan 3 (Set Rumah Pambakal ganti Set jadi Gardu-Malam Hari)

(Lighting on)

Pambakal mahadangi buhannya nang di jadwal akan gasan bajagaan. Buhan nang anum datangan sasuai suruhan pambakal. 

(Pambakal menunggui di muka rumah)

⁴¹Pambakal      : (Sambil basintar bahadangan di gardu) 

            Mananya buhannya nii, kada sing datangan, dua juta tahun mahadangi umatnya kadada jua buriniknya masih. Kabiasaan namun disuruh datang jam seini datangnya pasti talimpat, kada baingat wan jadwal nang ditatap akan. Mananya urang-urangnya nii (masih basasintar)

(Anto masuk Panggung)

⁴²Anti/Anto     : UWA! (Mangajuti)

⁴³Pambakal      : Nauzubillah! Makhluk nangapa ini? (Sambil menyintari)

⁴⁴Anti/Anto     : Iiii Uwa ni, ini ulun nah, Antiii

⁴⁵Pambakal      : Oooh Anto

⁴⁶Anti/Anto     : Antiiiiiiii, mun Anto pas siang kena, malamnya balain pulanggg…

⁴⁷Pambakal      : Mauk lalaki badampul, sarah haja! (jeda) Nii nangapa nii lambat datang? Baju pina kyani? Sintar mana sintar? 

⁴⁸Anti/Anto     : Umma umma…. Uwa nii. Ulun nii lambat gara-gara badandan dulu Wa aii, supaya bungas, kan ulun kambang desa, hihihi. 

⁴⁹Pambakal      : Hilllihhh muha kaya tampuyak basi, kisah musti!

⁵⁰Anti/Anto     : Dari pada pian, Bujang lapuk, Eh… (keceplosan)

⁵¹Pambakal      : Hah! Napa jar ikam tadi?! Kapintar pintaran Anto ngini…

⁵²Anti/Anto     : Antiiii….

(Amah masuk panggung sambil mamvlog, meulah Pambakal wan Anto heran)

⁵³Amah            : Hallo gais kambali lagi bersama Amah nang paling slebew sa-Kabupaten, jadi hari ini gue nii handak bakumpul nah di Gardu, mau ikut night patrol, anjay slebew, alias runda malam, gue sudah mambawa sintar nawan sarung loch, urang Banjar manyambatnya, “Tapih”, You know, know loe goe know…

⁵⁴Pambakal      : AMAHHH! (Mangaciaki Amah) Napa nang ikam ulah disini? (heran)

⁵⁵Amah            : Uma takalipik gue nah dapatnya (takajut) gue nii handak umpat maronda jua wa aii, sambil mangonten nah…

⁵⁶Pambakal      : Gua gue gua gue, Kada kada, ikam nii babinian, baronda nii buhan lakiannya haja, ikam kadada di daftar ronda nii Mah…

⁵⁷Amah            : Kenapa kyatu, culasnyaaa, ini ngarannya emansipasi wanita. Ni napa Si engsel lunggar ngini disini? Maka inya babinian…

⁵⁸Anti/Anto     : Nah bujur Wa aii jadi ulun bulik haja lah, bobo cantik di rumah, dadah…

⁵⁹Pambakal      : HET!!! Selangkah lagi patah tu batis

⁶⁰Anti/Anto     : Umaaa ngerinya sidin ngini

⁶¹Pambakal      : Amun ikam handak disini, Ayuha…Tasarah haja tapi jangan maracaui lah Mah, kena nyawa tumbur banar muntung

⁶²Amah            : Inggih ayuha, nyata wa aii. Gue handak baulah status dulu nah,  Selfy selfy, capsionnya ‘Asik maronda nich gue’

⁶³Pambakal      : Manaan lagi kawanan buhan kam nang lain? Balum ada buriniknya nah…

⁶⁴Anti/Anto     : Kada tahu wa aii, pinanya disangeti umanya pang bakagiatan malam (sambil bakaca-kaca)

⁶⁵Amah            : Tapi bisa aii jua kulir, alasan wara, ulun yang binian haja kada di sangeti mama aii…

⁶⁶Anti/Anto     : Mama yang mana nii mah?

⁶⁷Amah            : Yang mana-mana kah, mama unda banyak…

⁶⁸Pambakal      : Abah ikam pang kawin tarus

⁶⁹Amah            : Padah ja hiriii pian nih kada sing kawinan…

⁷⁰Amah & Anto: (Tetawaan)

(Ma Ilay wan Jali masuk panggung)

⁷¹Jali    : Haduhhh maaa, sudah jali padah kada handak…

⁷²Amah            : Nah wibu datang…

⁷³Ma Ilay         : Nah napa anakku jadi nang kyani, maka tadi siang pina gagah liwar. Lakasi jar mama, umpat wan kakawanan tu nah baramian handak ka Gardu, maka malam ini ikam yang ada di jadwal ronda

⁷⁴Jali    : Indahhh..

⁷⁵Ma Ilay         : Lakasiii... satu, dua, jangan sampai ka tiga nah, kalo dapat kayu bapangkih… Ti..

⁷⁶Jali    : Inggih inggih (Merangut)

⁷⁷Ma Ilay         : Nah kyatu pang awak anum katia kulir-kuliran…

(Jeda)

⁷⁸Ma Ilay         : Uuu Pambakal, batitip nah anak ulun nii, anui akan kalonya pina malalain surang. Bapintar-pintar jali aii dangarakan uwa tu nah…

⁷⁹Pambakal      : Ayuha lay aii, Aman aja amunnya lawan aku nii…

⁸⁰Jali    : Ma jali handak bulikkk…

⁸¹Ma Ilay         : Kapintar-pintarannya kam nii Jali, jangan dibulik akan Kal aii inya nii, biar tatangis kah…

⁸²Jali    : Handak bulik ja maa, kulir guring di gardu, rigat, sampai ka muha-muha hidin rigat jua te… (manunjuk Anto)

⁸³Ma Ilay         : Haduh Jaliii lakas tuha jua aku maurusi ikam ngini, pusang aku heh dapatnya (kamuaran)

⁸⁴Anti/Anto     : Nah nah pas banar, kalo pian pusang, kasalon Anti aja cil aii, di jamin pian kada pusang lagi tu pang…

⁸⁵Jali    : Ayuuu ma bulikan… (Teulang-ulang, bersahutan)

⁸⁶Anti/Anto     : Ayu cil lakasi kita… (teulang-ulang, bersahutan)

⁸⁷Ma Ilay         : Ampihannn!!! Haduhh buhan kam bedua nii, handak meolah aku matii kah, haduhhh

⁸⁸Jali    : Hayukk nah ma kita bulikan hajaaa…

⁸⁹Pambakal      : Ikam kada tahu lagi rami tahu lah guringan di gardu tu. Sudah ja lay aii bulik ja kam, biar aku nang meurusi kanakan ngini

⁹⁰Ma Ilay         : Hiyaam Kal aii bulik ja nah, sakit banar kapala ulun…

⁹¹Jali    : MAMAAA! MAMAAA!

(Ma Ilay bulik, keluar panggung)

⁹²Pambakal      : Sudah sudah coba badudukan dahulu nah

(Badudukan wadah pambakal) 

⁹³Pambakal      : Nah buhan kam sadar haja kalonya gardu kita tu buruk babanaran, rigat jua kaya jar Jali tadih. Makanya Uwa handak membawai buhan kam gotong royong sebelum ronda, kita simpuni gardu kita basamaan supaya nyaman baramian wan bakumpulan.

⁹⁴Anti/Anto     : Ihhhhh uyuhnya Wa (mengeluh)

⁹⁵Pambakal      : Amun baramian, kada tarasa uyuhnya, nah lakasi ka balakangan kita ka gardu. Jangan banyak bapander lagi kita nii, lakas bagawian. 

(Barataan baulah wan manyimpuni gardu bergotong royong)

⁹⁶Pambakal      : Nah bungas jua gardu kita amun disimpuni, harat jua kita baulah gardu ni nah…

⁹⁷Anti/Anto     : Nah hiih, barabahan aii pulang nah habis tu…

⁹⁸Pambakal      : Ehhh, siapa nang suruh barabahan, Barisannn! Satu, Dua… Siappp grak! (Pambakal tegas) Aku handak malihat seberapa siap pamuda kampung ku ni, Kampung Murung Rahayu, kita periksa kelengkapan!

(Barataan Takajutan, barisan)

⁹⁹Pambakal      : Ikam (menunjuk Anto) Apa yang ikam siap akan gasan maronda nii?

¹⁰⁰Anti/Anto    : Ulun basasiap banar pang sudah Wa aii. Basiap mandi, basiap baskincare, basiap badandan, basia-aapp…

¹⁰¹Pambakal    : Allahu… Mbah pang apa ja yang kam bawa gasan maronda malam ni?

¹⁰²Anti/Anto    : Banyak Wa aii, mambawa pupur, gincu, sampai ka masker nah ulun bawa jua…

¹⁰³Pambakal    : ANTOOO! 

¹⁰⁴Anti/Anto    : Antiiiii….

¹⁰⁵Pambakal    : Haduh pusang unda, ikam pang apa persiapan ikam? (Menunjuk Jali)

¹⁰⁶Jali   : Jali ada aii nah Wa aii, di sangui gagodoh banyalam wan mama jali

¹⁰⁷Pambakal    : (Manggaruk kepala) Jadi bubuhan ikam nii…(Melewati anti)

¹⁰⁸Amah           : Mbahhh ulun kada di takuni kah Wa? Culasnya pian nih melewati ulun, padahal ulun basiap banar nah, mambawa sintar, tapih, camilan sudah…

¹⁰⁹Pambakal    : Napa timbul lebih basiap Amah ngini, Haaaadoooh… Siappp grakkk!!! Nah dangarakan barataan, Uwa handak mamadahi akan hal panting ka buhan kam barataan

¹¹⁰Anti/Anto    : Apa tu Wa? Pian handak kawin kah wa?

¹¹¹Pambakal    : Wayooo, lain waluh, ini masalah panting yang buhan kam harus ingat sampai kena-kena, masalah bakatok Pantungan (mamingkut pantungan), tahulah buhan kam arti katokan Pantungan?

¹¹²Barataan      : Kadaaa…

¹¹³Pambakal    : Buhan kam nii itu ja kada tahu, Uwa jalasakan, dangari wan diingat babujur-bujur, nah amun bunyi katokannya kyani (katokan 1-1-1) artinya ada pambunuhan atau barita duka, amun kyani (katokan 2-2-2) ada kamalingan, amunnya kyani pulang (katokan 3-3-3) ada kabakaran, nah amun kayani (katokan 4-4-4) ada banjir atau bancana alam. Nah paham kalo sudah?

¹¹⁴Barataan      : Paham waaa…

¹¹⁵Jali   : Amunnya katokannya kyani pang Wa? (Bakatok pantongan hari raya) 

¹¹⁶Anto & Amah: Berarti isuk Raya…

¹¹⁷Pambakal    : Sudah sudah, barataan dangarakan, Istirahat di tempattt grak!

¹¹⁸Barataan      : Barabahan… (Handak berabah di gardu)

(Barataan timbulan barabahan wan badudukan)

¹¹⁹Pambakal    : Wayoooo!!! Tambah pusang aku kyani (Pusang)

¹²⁰Amah           : Kami kda tahu Wa aii, kan ujar pian istirahat tadi

¹²¹Pambakal    : Sudah gin badudukan ja gin sudah di gardu (Jeda) Uwa handak batakun nah wan buhan kam nii, haganya napa buhan kam pina kulir bakumpulan gasan maronda, pina kada siap jua gasan maronda?

¹²²Jali   : Baik jali guring di rumah Wa aii, main ml, makan mie, guring basalimut

¹²³Anti/Anto    : Nah bujur, dari pada malam-malam di gardu nih, Hiiihhh dinginnnn…

¹²⁴Amah           : Buhan kam badua nii kada harat lalu, kada jantan, buhan kam pang kada mambawa tapih makanya dingin, kaya aku nah mambawa tapih, padalah rami tahu lah bakumpulan kyani…

¹²⁵Pambakal    : Nahh bujur ujar Amah ngini

¹²⁶Anti/Anto    : Kisah musti banar kanakan ngini, tahu dari mana ikam amunnya rami

¹²⁷Amah           : Dari Followers gue lahhhh, loe kada bisi kalooo, kasihan Followers nya nol (tatawa)

¹²⁸Anti/Anto    : Hilllihhh, kisah musti banar, Muar (kemuaran)

¹²⁹Jali   : Napa pian maolah kagiatan ronda nii Wa? Harusnya buhan abah-abah nang maronda napa timbulan buhan kami?

¹³⁰Pambakal    : Kada ingat kah? Maka matian sudah nang tuha-tuhanya? Nah Abah kam mana? 

¹³¹Jali   : Hiih lah, hanyar ingat…

¹³²Pambakal    : Kasihan uma kam surangan dah, amun kenapa-kenapa siapa diharap selain ikam ngini…

¹³³Anti/Anto    : Hiih jali ngini

¹³⁴Jali   : Stttt bahinip ja, abah pian kadada jua

¹³⁵Anti/Anto    : Bujur pulang, haganya baapa lah abah kita di sana li?

¹³⁶Amah           : Mandiii Lumpur pinanya

¹³⁷Pambakal    : Tatangisan pang malihat buhan ikam badua nii

¹³⁸Amah           : Tapi ulun jua panasaran nah wa, napa harus kami yang anum yang maronda?

¹³⁹Anti/Anto    : Kami? Kami pang, ikam nii u-umpatan wara

¹⁴⁰Pambakal    : Harusnya lebih baik, nang anum yang ambil alih, sampai pabila nang tuha tarus nang turun tangan, harusnya buhan kam jua harus balajar gasan kampung surang. Makanya Uwa ulah jadwal ronda nii gasan bubuhan ikam nang anumnya balajaran jua. Buhan kam tahu aja kalo barita nang lagi viral?

¹⁴¹Jali   : Kasus Sambo kah Wa?

¹⁴²Barataan      : Lainnn!!!

¹⁴³Anti/Anto    : Iiiihhhh Ulun takutan kalonya maling tu ka wadah kita sini, kada kuasa Anti…

¹⁴⁴Amah           : Hiihh panakutannya Anto nihhh…

¹⁴⁵Anti/Anto    : Antiiii….

¹⁴⁶Pambakalan : Napa takutan tangkap aii baramian, makanya kita bakumpulan disini, baramian mambujuri gardu, maadakan ronda jua gasan sama-sama manjaga kaamanaan kampung nii. Gardu nii sabujurnya lawas banar dah kda di haragui lagi, padahal bajasa banar bahari, tapi sayangnya kada tapi tarasai lagi wahini. Banyak kapingan sajarah nya nang kawa di palajari.

¹⁴⁷Jali   : Kenapa bisa nang kyatu Wa?

¹⁴⁸Pambakalan : Bahari rami, kada kaya wahini, contonya buhan km ngini amun di jadwal akan hanyar buhan kam nii bakumpulan, amun kdda sudah aii tapalingkur di rumah kada tahu habar kampung surang. Makanya kita disini nii saling manjaga kaamanan salajuran basilaturahmi jua gasan sama-sama maangkat budaya nang bahari.

¹⁴⁹Anti/Anto    : Amunnya kyatu ulun handak batakun nah Wa aii, jadi lo…

¹⁵⁰Pambakalan : Aduhh, aduh hadang pina tapulait parut nah, kada tahan lagi, buhan km bapanderan dahulu di situ, jangan bulikannn… (Bukah mancincing kada tahan)

¹⁵¹Barataan      : (Heran)

¹⁵²Anto/Anti    : Ihhhhh balum sawat tapander lagi, laju bukah sidin…

(jeda)

¹⁵³Anto/Anti    : Eh eh eh buhannya kita bulikan ja kah kyapa? Mumpung ada kesempatan kabur nah…

¹⁵⁴Jali   : Satuju wan pian, pina ngeri nah hawa di gardu nii, pantas ja kadada nang kesiniannya, banyak nyamuk, dingin pulang, kutan jali (Sambil basasintar)

¹⁵⁵Amah           : Hiihh Anto nih, Ujar Uwa jangan bulikan, ikam nii jua seikung pina pengencet lalu…

¹⁵⁶Anto/Anti    : Stttt tumbur banar muntung ikam nih kya toa masigit. Lakasi bulikan haja, amun handak tepatak surangan disini ayuja kam surang, amun aku handak bobo cantik pang dirumah.

¹⁵⁷Amah           : Uuuu kyatu, ‘Niiih niih gaisss ada orang yang melalaikan tanggung jawab wan tugasnya, bisanya handak kabur tee, nah nah muhanya’, gue viral akan ikam…

¹⁵⁸Anto/Anti    : Kada pintarnya Amah ngini, hapus kada videonya!

¹⁵⁹Amah           : Kada, urang unda live (meolo-olo)

¹⁶⁰Anto/Anti    : Iiihhh mati’i

¹⁶¹Amah           : Kadaaa

(Amah wan Anto batumburan, Si Jali tatiba malihat sesuatu)

¹⁶²Jali   : Uyy uyy A-a-ampihan buhan pian? I-i-itu ada siapa tu disitu…

¹⁶³Amah           : Hah?! mana?

¹⁶⁴Jali   : Itu nah…

¹⁶⁵Anto/Anti    : Basambunyian (jeda), Itu pinanya pasti maling buhannya aiii, lihati maingkut-ingkut sarang burung, pasti maling burung urang…

¹⁶⁶Jali   : Kyapa nii jali takutan 

¹⁶⁷Anto/Anti    : Baapa takutan kita lawan, kasiii…

¹⁶⁸Amah           : Eh eh hadangi…

¹⁶⁹Anto/Anti    : WOIII SIAPA IKAM? MALING KH? MAJU SINI AMUN WANI, MAJU WOIIII!!! (Suara lakian)

(Amah wan Jali tadiam takutan)

¹⁷⁰Anto/Anti    : Jangan padah lah kami nii tekutan wan ikam (suara binian)

¹⁷¹Anto/Anti    : Eh kada kada (Menyodori Amah) I-ikam ja gin mah

¹⁷²Amah           : Napa jadi Unda Waluh (takutan) he…he… (setengah manangis) Ampun paman, peace peace

¹⁷³Jali   : Mamaaaa handak bulikkkk

(Anti wan Jali takuciakan)

¹⁷⁴Bah Ahuy    : (Tatawa) Haduhhh buhan kam nii, lucuuu, lucu banarrr (Tatawa babanaran)

¹⁷⁵Barataan      : KAIII!!!! (teriak)

¹⁷⁶Anto/Anti    : Pian nii meolah kami jantungan haja, muarrrr

¹⁷⁷Bah Ahuy    : Sudah, sudah tu, dudukan….

¹⁷⁸Amah           : Napa pian nii menakutani kami? 

¹⁷⁹Bah Ahuy    : (Tatawa) Aku wan pambakal baya handak membuktiakan haja, siap kada buhan kam amunnya tatimbulan ada maling bujuran. Tapi sakalinya (Tetawa) Pengencetan barataan…

¹⁸⁰Jali   : Tapi kada kyatu jua pang Kai aii

¹⁸¹Anto/Anti    : Pambakal? Bah Ajin akalan sidin wara nii!?

¹⁸²Bah Ahuy    : Pambakal tu niatannya handak maajarakan buhan kam haja kalonya bahaya tu kada kawa di tarka, kda tacium baunya, kda tarasa talintas di muhara mata. Nah lewat cara kyani buhan km jua bisa balajar kyapa caranya bahadapan wan bahaya. Aku handak mambuktiakan jua klonya buhan kam nii sekalinya dasar kada siap lagi manjaga kampung kita nii, jaka tahu aku ja surangan bajaga disini, kada meumpati ujar pambakal…

¹⁸³Anto/Anti    : Hiihhh muarnya ulun, Kasalll…

¹⁸⁴Amah           : Kami tu siap haja Kai aii…

¹⁸⁵Bah Ahuy    : Kada, buhan km nii balum siap lagi

¹⁸⁶Amah           : Siap haja kami nii amunnya dilajari bujur-bujur, ya lo buhannya…

¹⁸⁷Jali Anto      : (Balalihatan, kada yakin, tadiam)

¹⁸⁸Jali   : Mbah pang uwa nya di mana kai? Tadi bapadah kasakitan parut sidin

¹⁸⁹Bah Ahuy    : Paling setumat lagi kesini aii…

¹⁹⁰Anto/Anti    : Ajin sidin baakalan pulang nii (Manarka-narka)

¹⁹¹Amah           : Muntung Anto nii (Menapak tangan Anto)

¹⁹²Anti/Anto    : Antiiii!!! (bekuciak lakian)

¹⁹³Amah           : Badiam ayam presto!!!

(Ma Ilay datang tamanggah-manggah ka Gardu, Barataan heran)

¹⁹⁴Jali   : Nangapa Ma, pina handak siup tamanggah-manggah (panik)

¹⁹⁵Amah           : Pina nang kaya handak taparanak hidin (heran)

¹⁹⁶Bah Ahuy    : Bawa batanang dahulu bahinak, kenapa? Pina panik banar? (Maitihi dari ujung batis sampai ka kapala)

¹⁹⁷Mah Ilay      : MALING BAH!

¹⁹⁸Barataan      : HAH?! (Barataan bakuciak kecuali Anto)

¹⁹⁹Anto/Anti    : Uuu kada takajut ulun, ajin akalan sidin wara, pasti Uwa nii nang baulah rancana pulang, muarrrnya…

²⁰⁰Amah & Jali: Nah bujur bujur (gagarunum Jali wan Amah)

²⁰¹Ma Ilay        : Eh Eh tapi…

(Pambakal datang ka gardu)

²⁰²Pambakal    : Haduhhh nyamannya sudah parut (maingkut parut sidin)

²⁰³Anto/Anti    : Nah nah sidin pas banar, pasti pian baulah akalan lagi klo wa?!

²⁰⁴Pambakal    : Hah? Akalanan nangapa?

²⁰⁵Bah Ahuy    : Sudah ku padahi wan buhannya kalonya aku wan kam baulah rancana tu

²⁰⁶ambakal       : Uuuu nangitu… 

²⁰⁷Anto/Anti    : Ini pasti akalan pian jua kalo, jujur haja pian?!

²⁰⁸Pambakal    : Hah?

²⁰⁹Anto/Anti    : Nah pasti Ma Ilay jua baakalan kalo lawan Uwa?

²¹⁰Ma Ilay        : Baakalan apanya? Ini aku bujuran kamalingan! Dastar kuuu… (Histeris)

²¹¹Pambakal    : Hah, kamalingan?! Napa kada bapadah dari tadi… (mangatok pantungan) Malinggg maling…

²¹²Bah Ahuy    : Maling bujuran kah? Mananya malingnya? 

²¹³Anto/Anti    : Lain akalan pian kah Wa?

²¹⁴Pambakal    : Lain waluhhh, Lakasi cari barataan…

²¹⁵Barataan      : Maling Maling….

²¹⁶Amah           : Hallo hallo mbak reporter, i-inii ada Maling jamuran di Kampung Murung Rahayu, lakasi kesini mbak, jangan lawas-lawas lah… . Malinggggg

²¹⁷Barataan      : Maling Maling….

(Black Out)

Adegan 4

(Lighting on)

(Reporter Pembaca Berita)

²¹⁸Reporter      : Selamat Malam para pemirsa, kembali lagi bersama saya, sekarang saya melaporkan dari lokasi kejadian, bahwa ada penelpon yang melaporkan kejadian pencurian jemuran di Kampung Murung Rahayu yang telah meresahkan warga. Dapat terlihat di belakang saya pemirsa maling jemuran yang meresahkan di Kampung Murung Rahayu telah tertangkap warga yang sedang meronda. Begitulah laporan hari ini, sekian yang dapat saya laporkan, sampai jumpa di berita selanjutnya.

(Black Out)

SELESAI